Երջանկություն մարդիկ փնտրում են ողջ կյանքի ընթացքում և պատրաստ են ծախսել շատ ժամանակ, ուժեր և գումարներ՝ հասնելու դրան: Բայց ի՞նչ է իրական երջանկությունը: Հնարավո՞ր է արդյոք գտնել այն:
Գուցե հենց հիմա դուք լիակատար հուսահատության մեջ եք այն բանից, թե ինչ է կյանքն առաջարկում ձեզ այսօր: Գուցե ձեր սրտում ցավ ու զայրույթ կա, ինչը հեռու է երջանկություն ասվածից: Աստվածաշունչը շատ բան կարող է ասել երջանկության մասին ու այն մասին, թե ինչպես այն հնարավոր է գտնել:
Հավանաբար, դուք կզարմանաք, բայց երջանկության թեման հնչում է Երկրորդ Օրինաց գրքում արդեն, մինչդեռ շատերը կարծում են, թե Հին Կտարականի այս հատվածը հիմնականում նվիրվում է պատվիրաններին ու նախազգուշացումներին, որոնք տվել է Աստված:
«Եվ այնտեղ ուտեք ձեր Եհովա Աստծո առաջին, և ձեր ամեն ձեռնարկած բաների մեջ ուրախանաք դուք և ձեր ընտանիքը, որ քո Եհովա Աստվածը քեզ օրհնել է» (Բ Օրինաց 12.7):
«Եվ ձեր Եհովա Աստծո առաջին ուրախություն անեք, դուք և ձեր տղերքն ու աղջկերքը, ձեր ծառաները և աղախինները» (Բ Օրինաց 12.12):
«Եվ այնտեղ քո Եհովա Աստծո առաջին ուտես և ուրախանաս դու և քո ընտանիքը» (Բ Օրինաց 14.26):
«Եվ ուրախություն անես քո Եհովա Աստծո առաջին դու և քո տղան և աղջիկը, քո ծառան և աղախինը, և քո դռներումն եղող ղևտացին, և ձեր միջումը գտնված օտարականը, որբը և որբևայրին այն տեղը, որ քո Եհովա Աստվածը կընտրի իր անունի բնակության համար» (Բ Օրինաց 16.11):
Միայն մեկ գլխում «ուրախանաս» բառը հայտնվում է 7 անգամ, իսկ այս գլուխներում ուրախությունն ու ցնծությունը հիշատակվում են ավելի, քան մնացած առաջին հինգ գրքերում: Հարց է առաջանում. ինչի՞ համար պետք է այսչափ ուրախանա Իսրայելը, անգամ ստրուկները, որբերը և այրիները:
Պատասխանը հետևյալն է. Իսրայելը շատ բաների համար կարող է գոհանալ: Երբ նրանք պատրաստվում էին մտնել Խոստացված երկիր, Մովսեսը հիշեցնում է Իսրայելին, որ Աստված Իր մեծ ողորմության ու սիրո համեմատ ընտրել է նրանց ու ազատել եգիպտական լծից, հավատարիմ է եղել իրենց հանդեպ և ապահովել նրանց ամեն անհրաժեշտ բաներով՝ անապատում լինելու ողջ 40 տարիների ընթացքում, տվել օրենքներ ու կանոններ՝ առողջ ու բարեկեցիկ կյանքի համար:
Նաև այս խոսքերը հայտնում են Աստծո մտադրության մասին՝ Իր ժողովրդին բերելու մի երկիր, որտեղ նրանք կկարողանան ապրել, հող մշակել և լինել ազատ ժողովուրդ, ոչ թե ստրուկներ, ինչպես Եգիպտոսում: Եվ այս հատվածի գագաթնակետն էլ այն մասին պատմությունն է, որ Աստված պատրաստվում է վերացնել կռապաշտությունը Խոստացված երկրից և ընտրել բնակության վայր Իր համար, որտեղ Իր ժողովուրդը կերկրպագի ու կծառայի Իրեն զոհերի և տոնակատարությունների միջոցով: Սա մի ամբողջ ժողովրդի հիասքանչ մարգարեական պատկեր է, որը հավաքվել է ինչպես մեկ ընտանիք՝ երկրպագելու Իր Աստծուն:
Դուք երջանկություն եք փափագում, որը, գուցե, չեք կարողանում գտնել ո՛չ գումարների, ո՛չ հաճույքների, ո՛չ էլ մեկ այլ բանի մեջ, ինչ աշխարհն առաջարկում է ձեզ այսօր: Ճշմարիտ ու հարատև երջանկության բանալին Նա է՝ Մեկը, Ով ավելի մեծ ու կարող է, քան մենք, Ով Իր կյանքը դրել է ձեզ համար և սպասում է, թե երբ դուք կդառնաք Իրեն՝ ստանալու այն սերը, ներումն ու ուրախությունը, որ Նա ունի ձեզ համար. և Նա Հիսուսն է:
Այս խոսքերը թող այսօր ծառայեն մեզ համար՝ որպես հիշեցում այն մասին, որ մենք ունենք պատճառ ուրախանալու, անգամ եթե կյանքը դժվար է թվում: Մենք ընտրվել ենք, ազատվել կուռքերից ու մեղքից, ներվել ու ընդունվել ենք, որպեսզի ունենանք ճիշտ հարաբերություններ Աստծո հետ:
Նա նույնպես հավատարմորեն հոգում է մեր բոլոր կարիքները: Հետաքրքիր է, որ եբրայերեն «ուրախացեք» բառը հնչում է՝ որպես պատվեր, ոչ թե զգացում, որը կարող է ցանկացած պահի անցնել, և այս պատճառով էլ արդեն Նոր Ուխտում Պողոսը շարունակում է.
«Ուրախ եղեք Տերումն ամեն ժամանակ. դարձյալ ասում եմ՝ ուրախ եղեք» (Փիլիպպեցիս 4.4):
Ահա թե ինչ է իրական երջանկությունը: Այսօր ընդունեք որոշում՝ ուրախանալու և հիշելու այն ամենը, ինչ Աստված արել է ձեզ համար:
Աղբյուր՝ ieshua.org