Մենք բոլորս ենք վաղ թե ուշ տառապանք վերապրելու. սրանում կասկած չկա: Դրա համար էլ զարմանալի է, որ երբ գալիս է այդ ծանր ընթացքը՝ շատերս պատրաստ չենք լինում: Ու քանի որ ոչ ոք ապահովագրված չէ տառապանքներից, լավ կլինի Աստվածաշնչում գտնել խոսքեր, որոնցով կարող ենք առաջնորդվել այդ դժվարին ժամանակներում:

Ահա 10 քայլ, որ ինքս եմ գտել ու առաջարկում եմ ձեզ էլ ուշադրություն դարձնել դրանց վրա:

  1. Թող տառապանքները ձեզ չզարմացնեն (Ա Պետրոս 4.12): Աստծո Որդին տառապեց, ուրեմն Նրա հետևորդներն էլ կարող են ունենալ նման ընթացք իրենց կյանքերում: Դուք չեք խուսափի դրանից, քանզի դրանով է լցված աշխարհը, բայց կարող եք այդ տառապանքները զանազանել՝ ինչպես աշխարհի, այնպես էլ ձեր անձնական բարօրության համար:
  2. Ապրեք հավատքով, նայեք անտեսանելիին (Եբրայեցիս 2.2): Սովորաբար տեսողությունը չի բավարարում: Ձեր աչքերը կհուշեն, թե Աստված հեռու է ու լուռ է: Բայց ճշմարտությունն այն է, որ Նա մոտ է. աներևույթ, բայց մոտ: Նա վերաբերվում է հատուկ սիրով նրանց, ովքեր տառապանքի միջով են անցնում: Ուստի վարժեցրեք ձեր հոգևոր տեսողությունը աղոթքով, Խոսքով, հոգևոր շփումով:
  3. Տառապանքները ջրի երես կհանեն այն, ինչ իրականում կա ձեր սրտում: Դրանք կփորձեն ձեզ (Հակոբոս 1.2): Ինչպե՞ս կպահեք ձեզ այդ փորձության ժամերին՝ ավելի՞ կմոտենաք Հիսուսին, թե՞ կամփոփվեք ձեր մեջ:
  4. Աստված Աստված է, իսկ դուք՝ ոչ (Հոբ 38.42): Սա կարևոր է: Արքային հնազանդվելն ու խոնարհվելը կարող են հանդարտեցնել ձեր որոշ հարցումները:
  5. Ապաշխարեք ձեր մեղքի համար: Ոչ մի նոր բան չկա դրա մեջ: Դա ամենօրյա կյանքի սովորական մասն է: Բայց միշտ օգնում է հստակորեն տեսնել Քրիստոսի Խաչը: Սա ամենաարագ միջոցն է՝ տեսնելու Աստծո հարատև ու շռայլ սերը (Եբրայեցիս 12):
  6. Նայեք Գրքերում Տառապող Ծառային. Նա կիսեց ձեր տառապանքը, ուրեմն դուք էլ կարող եք Նրանը կիսել (Եսայի 49-53, Հովհաննես 10-21):
  7. Խոսեք Աստծո հետ ազնվորեն և հաճախ: Սա անչափ անհրաժեշտ է: Ուղղակի խոսեք, հառաչեք, աղաղակեք: Եվ թող լինի նաև ինչ-որ մեկը, ով կկարդա ձեզ համար սաղմոսներ ու թույլ ձայնով «ամեն» կասի:
  8. Սպասեք, որ այդ անապատում դուք Աստծուն ավելի լավ եք ճանաչելու: Այդպես է Նա սովորաբար աշխատում Իր մարդկանց հետ (Փիլիպպեցիս 3.10-11):
  9. Շփվեք նրանց հետ, ովքեր արդեն վերապրել են իրենց կյանքում տառապանքներ, կարդացեք նրանց գրած գրքերը, լսեք նրանց: Դուք մենակ չեք:
  10. Առաջ նայեք: Ձեզ անհրաժեշտ է հոգևոր տեսիլք: Մենք բոլորս ճամփորդության մեջ ենք, և դրա ավարտը Աստծո տաճարում է (Սաղմոս 84):

Ես նկատել եմ, որ ծանր ժամանակներում սեփական բառերը, որոնք մեզ որևէ մեկը հիշեցնում է, ավելի հեշտ են ընդունվում մեր կողմից, քան թե ուրիշ մեկի ասած խոսքերը: Դրա համար ես լիազորել եմ իմ կնոջը, երեխաներին և ընկերներին հիշեցնելու ինձ իմ իսկ ասած քաջալերման խոսքերը այն ժամանակներում, երբ ճանապարհս շատ ծանր ու տանջահար է լինում: