Մեր օրերում բազմաթիվ ծնողներ անհանգստանում են իրենց երեխաների զարգացմամբ: Որոշները մանուկներին խաղացնում են զարգացնող խաղերով և գրանցում նրանց ամենատարբեր դասերի (քիչ է մնում՝ մսուրային տարիքից)՝ համոզված լինելով, որ դա իրենց զավակներին անվիճելի առավելություններ կտա կյանքում:

Այնուամենայնիվ, հայտնի ռուս հոգելեզվաբան և նյարդակենսաբան Տատյանա Չերնիգովսկայան այլ կարծիքի է:

Իր «Ինչպես սովորեցնել ուղեղին սովորել» դասախոսությունում նա բացատրում է, որ կարևոր է ոչ այնքան երեխային գիտելիքներով լցնելը, որքան սովորեցնելը նրան՝ ուղեղը ճիշտ օգտագործել: Այլ խոսքերով՝ սովորեցնել նրան սովորել:

«Երեխաների համար շատ կարևոր է՝ սկսել ճիշտ ժամանակին սովորել: Մեր օրերի երեխայի գլխավոր դժբախտությունը փառասեր ծնողներն են:

Երբ ինձ ասում են. «Ես իմ որդուն երկու տարեկանում սկսեցի կարդալ սովորեցնել», ես պատասխանում եմ «Այ քեզ հիմարություն»:

Ինչո՞ւ է դա անհրաժեշտ: Նա երկու տարեկանում դեռևս չի կարող դա անել: Նրա ուղեղը պատրաստ չէ դրան:

Եթե դուք վարժեցնեք նրան, նա, իհարկե, կկարդա էլ, գուցե կգրի էլ, բայց մենք ձեզ հետ այլ խնդիր ունենք:

Ընդհանրապես երեխաների մոտ զարգացման արագությունը տարբեր է: Կա մի այսպիսի եզրույթ՝ «դպրոցական հասունության տարիք»: Այն որոշվում է այսպես. մի երեխան 7 տարեկան է, մյուսը՝ նույնպես, բայց մեկը գնում է դպրոց, որովհետև նրա ուղեղը պատրաստ է դրան, իսկ մյուսին դեռևս կես տարի պետք է տանը արջուկով խաղալ և միայն դրանից հետո դասի նստել:

Զարգացրեք շարժիչ հմտությունները

Եթե երեխան, դպրոց գալով, չի սովորում գրել, չի սովորում գրչի շարժումներ, եթե մանկապարտեզում նա ոչինչ չի սարքում, չի կտրում մկրատով, ապա նրա շարժիչ հմտությունները չեն ձևավորվում: Իսկ դա հենց այն է, ինչ ազդում է խոսքի գործառույթների վրա: Եթե երեխայի մոտ չեն զարգանում շարժիչ հմտությունները, ապա նրա ուղեղը չի գործում:

Լսեք երաժշտություն ու սովորեցրեք անել դա երեխային

Երբ երեխան սովոր է երաժշտություն լսելուն, նա սովորում է ուշադրություն դարձնել մանր դետալների վրա, տարբերել հնչյունները և դադարները դրանց միջև: Եվ հենց այս ժամանակ է ձևավորվում նեյրոնային ցանցի բարակ երեսակումը:

Երբ մենք լսում ենք խոսքերը, կատարվում է ֆիզիկական ազդանշանի բարդ մշակումը: Այս ամենը ֆիզիկա է. լսում է ականջը, բայց, իրականում, լսում է ուղեղը: Եվ վաղ տարիքում, երբ երաժշտությունը մասնակցում է մարդու զարգացմանը, դա ուժեղ ազդեցություն է ունենում նրա նեյրոնային ցանցի որակի ու կառուցվածքի վրա:

 Թույլ մի տվեք ուղեղին՝ ծուլանալ

Մոլորակում ապրող բոլոր մարդիկ չէ, որ հանճարեղ են: Եթե երեխան ունի վատ գեներ, ապա ոչինչ անել չես կարող:

Բայց եթե անգամ գեները լավն են, դա, միևնույնն է, բավարար չէ: Գուցե տատիկից նա որպես ժառանգություն ստացել է «Steinway» դաշնամուր, բայց պետք է սովորել նվագել դրա վրա: Նույնկերպ էլ երեխան կարող է ունենալ հրաշալի ուղեղ, բայց եթե այն չզարգանա, չձևավորվի, դա դատարկ գործ է: Ուղեղը սկսում է ծուլանալ, եթե չունի իմացական բեռ: Եթե պառկեք բազմոցին և կես տարի այդպես անցկացնեք, ապա չեք կարողանա վեր կենալ: Եվ ուղեղի հետ էլ նույնն է կատարվում:

Նիկիտա Սկորոբոգատով

Post Views: 13