«Եվ վեր ելավ խնկերի ծուխը սուրբերի աղոթքների հետ հրեշտակի ձեռքիցն Աստծո առաջին։ Եվ հրեշտակն այն խնկանոցն առավ և լցրեց սեղանի կրակիցը և գցեց երկրի վրա, և ձայներ և որոտմունքներ և փայլատակներ և շարժ եղավ» (Հայտնություն 8.3-5):
Եթե Աստծո զավակների մեջ արթնանար աղոթքի հոգին, դրան անպայման կհետևեր օրհնությունների հոսքը անգամ եկեղեցուց դուրս:
Աստծուն շատ հավատացողներ համարում են, որ աղոթքը աշխատանք է, նման քարոզի: Վերընթերցեք Հոկոբոս 5.16-ը: Այո՛, կա աշխատանք, որ կատարվում է աղոթքի միջոցով, բայց նկատեք՝ դա պետք է լինի «արդար» մարդու աղոթք: Արդար՝ ոչ միայն որովհետև վերջինս փրկագնված է ու ծածկված Քրիստոսի արյամբ, այլև արդար իր անձնական գործնական կյանքում, արդար՝ մեղքի նկատմամբ:
Ահա թե որոնք են պարտադիր պայմանները, որպեսզի աղոթքը լսելի լինի և ունենա մեծ արդյունքներ: Ով իրեն ընծայում է աղոթքին, պետք է ապրի մեղքի հանդեպ հաղթանակի կյանքով: Եվ սա է պատճառը, որ ձեր առջև դրված առաջին հարցը պետք է լինի. «Արդյոք իմ ամենօրյա կյանքում ես անձնական հաղթանակ ունենո՞ւմ եմ»:
Ցանկանո՞ւմ եք դա արդյոք: Արդյոք դա ձեր հստակ որոշո՞ւմն է: Ցավոք սրտի, կան շատերը, ովքեր խոսում են հաղթանակի մասին, բայց չեն ցանկանում պահպանել հաղթական կյանքի պայմանները:
Եղիայի աղոթքը.
Ուշադրություն դարձնենք այն աղոթքի արդյունքին, որի մասին Հակոբոսն է խոսում: «Եղիան մարդ էր մեզ պես»՝ ասում է Հակոբոսը և հետո ցույց տալիս նրա աղոթքի գործը: Դրանով նա ասես ասում է. այն, ինչ որ հնարավոր էր Եղիային, հնարավոր է նաև մեզ: Նա համառորեն էր խնդրում, որ անձրև չլինի, և անձրև չեղավ: Այս մարդը աղոթքով զորություն ստացավ երկինքը փակելու, մինչդեռ նա մարդ էր մեզ պես:
Աղոթքը, որը կազդի ողջ երկրի վրա, աշխատանք է: Մենք դեռևս չենք հասկացել այդ աղոթքի հետևանքները:
Շատերը աղոթում են այն պահին, երբ ոչինչ չունեն անելու, և անգամ ոչ միշտ, մինչդեռ ճշմարիտ աղոթքը հոգու, շնչի և կամքի աշխատանքն է, որն իր արդյունքով ավելի լայն է և ավելի անհրաժեշտ ամեն տեսակ ծառայությունից: Եղիան մարդ էր մեզ պես, բայց նա կարողանում էր այնպես աղոթել ու աղոթքի միջոցով այնպիսի գործեր կատարել, որը տարածվում էր ողջ երկրով մեկ:
Պետք է, որ մենք հոգով հասկանանք, թե ինչ կարող է մարդը ձեռք բերել աղոթքի միջոցով, և որոշենք աղոթքի միջոցով ճանաչել Աստծուն, ինչպես դա անում էր Եղիան: Ամեն հավատացյալ, ով անկեղծորեն դա ցանկանում է, կարող է սովորել, թե ինչպես է պետք աղոթել:
Եթե դուք ճանաչեք Աստծուն և Նրա մտքերը և ճանաչեք ժամանակը, թե երբ է Աստված ցանկանում, որ դուք կատարեք այս կամ այն բանը, ապա դուք կարող կլինեք աղոթելու Եղիայի պես, ով ճանաչում էր Իր Աստծուն և Նրա կամքը, և դա էր պատճառը, որ Աստված կարող եղավ գործելու Եղիայի երկրում նրա աղոթքով:
Այնպես էլ դուք. եթե ճանաչեք Աստծո կամքը, կկարողանաք գործել ողջ երկրով և անգամ ողջ աշխարհով մեկ:
Ջեսսի Փեն Լյուիս՝
ուելսացի ավետարանիչ-խոսնակ, բազում ավետարանչական գրքերի հեղինակ (1861-1927)