Անցյալ շաբաթ ես ու կինս տոնեցինք մեր ամուսնության 22 տարին: Ընթրելիս մենք զրուցում էինք այն ճամփորդության մասին, որով Տերը միասին անցկացնում է մեզ, այն մասին, թե ինչն ենք ամենաշատը վայելում իրար մեջ, և թե ինչպես է մեր ամուսնությունը մեզ ավելի լավը դարձրել:
Մեր ամուսնությունը կատարյալ չես կոչի, բայց այն առողջ ամուսնություն է, և ես շնորհակալ եմ կնոջս՝ Քեյին ու այն ժամանակի համար, որ ունեցել ենք իրար ճանաչելու և մեկս մեկին ծառայելու համար: Ես չեմ ցանկանում լինել միայն «լավ քրիստոնյա» կամ «հաջողված հովիվ», այլ փափագում եմ լինել նաև «լավ ամուսին»:
Իր «Լավ քրիստոնյաները լավ ամուսիննե՞ր են» գրքում Դորին Մուրը ընթերցողին հնարավորություն է տալիս հայացք գցելու երեք հայտնի աստվածաբանների և հովիվների ծառայության ու ընտանիքների վրա, ովքեր ծառայում էին 18-րդ դարում՝ Ջոն Ուեսլի, Ջորջ Ուայթֆիլդ և Ջոնաթան Էդվարդս: Գրքում մենք իմանում ենք, որ հաջողված ծառայություն ունենալը միշտ չէ, որ նշանակում է ունենալ առողջ ամուսնություն: Ջոն Ուեսլին սառն էր իր կնոջ նկատմամբ, մշտապես ճամփորդությունների մեջ էր և հազվադեպ էր տեսնում նրան, նա անգամ ներկա չէր նրա հուղարկավորության արարողությանը: Ջորջ Ուայթֆիլդի ամուսնությունը արտաքուստ նման էր ավելի շատ ծառայության մեջ փոխադարձ համաձայնության, քան խորը կապով և խանդավառությամբ լցված փոխհարաբերությունների: Այս երեք ամուսնություններից միայն Ջոնաթան Էդվարդսինն է, ում ընթերցողը կցանկանա ընդօրինակել: Ջոնաթան Էդվարդսը տարբերություն չէր դնում Տիրոջը ծառայելու և իր ընտանիքի միջև: Նա նվիրված էր իր ամուսնությանը նույնքան, որքան նվիրված էր ծառայությանը: Նա առանձին չէր դիտարկում դրանք: Նա որդեգրել էր առավելությունն ու պատասխանատությունը՝ իր կնոջն ու երեխաներին ծառայելու: Մենք էլ, ինչպես Ջոնաթան Էդվարդսը, չպետք է ամուսնությունը դիտարկենք պարզապես որպես միջոց, գործիք՝ առողջ ծառայության համար, այլ՝ որպես մեր ծառայության մի մաս:
Քո ամուսնությունը քո ամենակարևոր ծառայությունն է
Այն, որ պատմությունը արձանագրել է, որ հնարավոր է ունենալ հաջողված ծառայություն առանց հաջողված ընտանիքի, դեռ չի նշանակում, որ դա այն է, ինչ Աստված է կամենում մեզ համար, ոչ էլ այն, ինչ Նա կամենում է այն մարդկանց համար, ովքեր մեզնից օրինակ են վերցնում: Ահա երեք պատճառ, թե ինչու է քո ամուսնությունը քո ամենակարևոր ծառայությունը:
- Որովհետև քո ամուսնությունը Ավետարանի խորհրդապատկերն է
Առողջ ամուսնությունը աշխարհին փոխանցում է Ավետարանի գեղեցիկ պատկերը: Հենց այնպես, ինչպես Աստված միացնում է տղամարդուն ու կնոջը և նրանց մեկ դարձնում, Քրիստոսը միացնում է մեզ Իրեն: Մենք մեկ ենք Նրա հետ և ստանում ենք Նրա արդարությունը: Նա հետևում է մեզ, սիրում մեզ հավիտենական սիրով, շարունակաբար ներում մեզ և հոգում մեր մասին: Երբ մենք նվիրված ենք մեր կողակցին, մարդկանց կարող է դա հիշեցնել մեր հանդեպ Աստծո ունեցած նվիրման մասին:
- Որովհետև ընտանիքը մեծագույն նվերն է, որ կարող ես տալ երեխաներիդ
Ձեր երեխաներին առողջ եկեղեցի նվիրելու հետ մեկտեղ կա ևս կարևոր մի բան. հնարավորություն տալ՝ ունենալու երջանիկ ընտանիք: Ես այնքան շնորհակալ եմ, որ կարող եմ տալ երեխաներիս առողջ եկեղեցի, եկեղեցի, որ նրանք սիրում են, բայց ավելի կարևոր է տալ նրանց առողջ ընտանիք: Առողջ ամուսնությունը երեխաների մոտ ստեղծում է անվտանգության զգացում և լավ պայմաններ՝ Ավետարանի ընկալման համար:
- Որովհետև ամուսնությունը սրբագործում է
Ամուսնությունը չկարևորել՝ նշանակում է չկարևորել սրբագործումը, որովհետև Աստված օգտագործում է ամուսնությունը՝ մեզ Իրեն կերպարանակից դարձնելու համար: Ես գիտեմ սա իմ անձնական օրինակից, որովհետև Աստված օգտագործում է իմ կնոջը՝ աճեցնելու ինձ ուրիշների հանդեպ սրտացավության մեջ, օգնելու ինձ տեսնել՝ ինչպես են ուրիշները մտածում, հիշեցնելու, որ քրիստոնեական կյանքը ուրախությամբ լցված կյանք է:
Ամենակարևոր ծառայությունը, որ կանես այս շաբաթ, քո սեփական ընտանիքին ծառայելն է:
Էրիկ Գայգեր